अंतर

ना बोलणार मी काही, ना बोलणार तू काही.
पण अंतर तुझ्या-माझ्यातलं, शांत राहणार नाही!

ना बघणार मी कधी, ना बघणार तू कधी.
पण नजरेचा काय भरोसा, की ती पाहणार नाही!
    अंतर तुझ्या-माझ्यातलं, शांत राहणार नाही!

ना  मी लिहिणार काही, ना तू वाचणार काही.
शब्द माझे तुझ्याकडे, मी आणणार नाही!
   अंतर तुझ्या-माझ्यातलं, शांत राहणार नाही!

नसणार  मी आता, तुझ्या जागण्याचं कारण.
जागेल मन माझं, मी जागणार नाही!
   अंतर तुझ्या-माझ्यातलं, शांत राहणार नाही!

ना  मी मागणार काही, ना तू देणार काही.
तुला देतोय प्रत्येक श्वास माझा, मी सांगणार नाही!
   अंतर तुझ्या-माझ्यातलं, शांत राहणार नाही!